Hér er hægt að líta yfir það helsta sem gerðist árið 2002 og var fjallað um hér á heimasíðunni.
Meiri fréttir af skipulagsmálum á Hamranesi
Búið er að senda bæjarverkfræðingi bréf vegna framkvæmda (smella
hér til að lesa það)
á Hamranesi. Beðið verður svara við þessu bréfi og þá sent bréf og
kynningarbæklingur til allra bæjarfulltrúa til að upplýsa þá um þetta mál.
Fréttir af skipulagsmálum á Hamranesi
Eins og kom fram á aðalfundi félagsins 7. nóvember s.l. hafa
félagsmenn verulegar áhyggjur af þeim framkvæmdum komnar eru í gang austan við
okkar svæði á Hamranesi. Leigusamningur um svæðið var endurnýjaður á fundi með
bæjarstjóra á árinu 1999 til 10 ára. Eins og komið hefur fram áður sendum við bréf
varðandi þessi mál til bæjarráðs á árinu 2000 (smella
hér til að sjá bréfið). Svohljóðandi svar barst frá bæjarverkfræðingi;
"Bæjarráð Hafnarfjarðar hefur falið mér undirrituðum að svara fyrirspurn
þinni um fyrirhugaðar lóðir í nágrenni flugvallar Þyts. Vinna við endurskoðun
aðalskipulags stendur yfir. Í þeirri vinnu verður tekið á fyrirspurnum sem
liggja fyrir um starfsemi á þessu svæði. Í aðalskipulagsvinnu er vani að hafa
samráð við hagsmunaaðila eins og í þessu tilfelli. Afrit af bréfi þínu er komið
til skipulagsstjóra og þ.a.l. vitneskja um áhyggjur ykkar. Virðingarfyllst.
Kristinn Ó Magnússon, bæjarverkfræðingur." Í framhaldi af þessu
óskaði skipulagsstjóri eftir fundi haustið 2001 þar sem við ítrekuðum okkar mál
varðandi framtíðarstaðsetningu og öryggismál. Síðan berst okkur bréf frá
bæjarverkfræðingi í október á þessu ári þar sem tilkynnt er um væntanlegt
íþróttasvæði austan við okkar flugvöll á Hamranesi. Í sömu viku hefjast
framkvæmdir og þá höf'ðum við samband við skipulagsstjóra með tölvupósti sem var
svohljóðandi; "Hafnarfjarðarbær - Skipulagsdeild B.t. Hafdísar,
skipulagsstjóra Málefni: Fyrirhugað íþróttasvæði austan við flugvöll
Flugmódelfélagsins Þyts á Hamranesi. Stjórn Flugmódelfélagsins Þyts hefur
uppgötvað að framkvæmdir séu hafnar við íþróttavöll austan við flugvöll
félagsins að Hamranesi og að hann sé staðsettur nánast upp við svæði félagsins.
Þetta hefur komið stjórn félagsins í opna skjöldu, þar sem á árinu 2000 var sent
bréf til bæjarráðs Hafnarfjarðar þar sem varað var við hugmyndum um
einhverskonar starfsemi í næsta umhverfi okkar svæðis og þar vísað til
öryggismála. Þessi staðsetning á íþróttasvæðinu sem hefur verið valin, er enn
alvarlegri fyrir það að hún er undir aðflugslínu að austur/vestur flugbraut
svæðisins sem mest er notuð til lendinga. Í lendingu er yfirleitt mesta hættan á
að eithvað fari úrskeiðis og því mjög hættulegt að fólk verði á þessum stað.
Undanfarin ár hafa þau flugmódel sem notuð eru í félaginu stækkað og eru þau
stærstu í dag með allt að þriggja metra vænghaf, eru allt að 20 kíló að þyngd og
með allt að 8 hestafla mótorum. Í félaginu er mikið lagt upp úr öryggismálum og
gilda mjög strangar reglur um alla umgengni á svæðinu og hvernig flugi er
háttað.Við viljum minna á að við tókum við "ónýtu" landi sem var öskuhaugar
Hafnarfjarðar. Ekið var 310 vörubílahlössum af mold á svæðið og samtals 1890
rúmmetrum af grús undir flugbrautir og til að gera veg frá hliðinu að
bílastæðinu. Félagið malbikaði síðan 1130 fermetra af flugbrautum og
stofnkostnaður brauta (framreiknað til 2002) er um um 3,6 milljónir króna.
Einnig er við hliðina á flugvellinum 80 fermetra þjónustubygging og rafstöð í
sérstæðu húsi við hliðina. Félagið endurnýjaði leigusamning félagsins til 10 ára
á árinu 1999 með sérstöku samkomulagi við þáverandi bæjarstjóra. Einnig áttu
fulltrúar frá félaginu fund með skipulagsstjóra Hafnarfjarðar þriðjudaginn 28.
ágúst 2001 varðandi stöðu félagsins varðandi flugvöllinn á Hamranesi og
hugsanlegar breytingar á staðsetningu í framtíðinni. Okkur var sagt að
verið væri að vinna aðalskipulag fyrir svæðið sem yrði líklega tilbúið fyrir
áramót. Við lýstum vilja til að vera með okkar starfsemi á Hamranesi eins lengi
og kostur væri og ef við þyrftum að fara, að okkur yrði þá úthlutað nýtt svæði
sem næst Hamranesi (líklega aðeins sunnar í hrauninu). Stjórn félagsins óskar
eftir viðræðum við Hafnarfjarðarbæ um þetta mál eins fljótt og nokkur kostur er.
Með bestu kveðjum. Guðmundur G. Kristinsson formaður Flugmódelfélagsins Þyts."
Í framhaldi af þessu hafði skipulagsstjóri samband við formann félagsins
og sagði ekkert í stöðunni í skipulagsmálum sem ætti að verða til þess að við
þyrftum að fara af okkar svæði næstu 10 árin. Ákvörðun um íþrótta- og
æfingasvæði austan við okkar svæði væri tekin á pólitískum forsendum og hún
mundi standa. Verið er að undirbúa bréf sem sent verður til bæjarverkfræðings
sem svar við tilkynningu um þær framkvæmdir sem eru í gangi og þar óskað eftir
að gengið verði skriflega frá leigusamningi um okkar svæði. Einnig er verið að
undirbúa bréf til bæjarráðs til að upplýsa aftur (var gert með bréfi á árinu
2000) pólitíska fulltrúa í Hafnarfirði um alvöruna sem liggur á bak við þá
ákvörðun að setja íþróttasvæði undir aðal aðflugslínu á okkar flugvelli.
Aðalfundurfundur Þyts verður í Garðaskóla
fimmtud. 7. nóvember kl. 20:00
Á dagskrá fundarins eru venjuleg aðalfundarstörf:
Skýrsla formanns um störf félagsins á liðnu starfsári, reikningar lagðir fram
til samþykktar, fjárhagsáætlun og ákvörðun félagsgjalda, skýrslur nefnda,
kosning formanns samkvæmt ákvæðum 9.gr., kosning ritara, gjaldkera og
meðstjórnenda samkvæmt ákvæðum 9.gr. (kosið verður þetta árið um formann,
ritara og meðstjórnanada), kosning endurskoðenda, kosning í nefndir,
tillögur og lagabreytingar (engar borist) og önnur mál.
Knattspyrnuvöllur að koma undir aðflugslínu
úr austri á Hamranesi!!!
Stjórn félagsins frétti 18. október af framkvæmdum á knattspyrnuvelli
austan við flugvallarsvæði á Hamranesi. Þetta kom verulega á óvart þegar litið
er til þess að við sendum bréf (smellir hér til að
sjá bréfið) til bæjarráðs um hættuna samfara módelflugi á svæðinu í kringum
Hamranes. Í þessu bréfi var varað við því að setja golfvöll eða aðra starsfemi á
svæðið í kringum okkar flugsvæði. Stjórn félagsins átti í framhaldi af bréfi frá
skipulagsyfirvöldum í Hafnarfirði fund með þeim 28. ágúst 2001. Þar var rætt um
okkar stöðu með flugvöllinn á Hamranesi og hugsanlegar breytingar á staðsetningu
í framtíðinni. Okkur var tjáð að verið væri að vinna aðalskipulag fyrir svæðið
sem átti að verða tilbúið fyrir áramót. Við lýstum vilja til að vera með okkar starfsemi
á Hamranesi eins lengi og kostur væri og ef við þyrftum að fara, að okkur yrði
þá úthlutað nýtt svæði sem næst Hamranesi (líklega aðeins sunnar í hrauninu).
Einnig gerðum við athugasemdir við hæðina vestan við svæðið okkar í dag sem
verulega hefur hækkað á undanförnum árum og "tippinn" fyrir hrossaskítinn vestan
við okkur. Við spurðumst einnig fyrir um þann möguleika að fá rafmagn á Hamranes
og var okkur vísað á Orkuveitu Suðurnesja í þeim efnum. Við sögðumst treysta
því að Hafnarfjarðarbær yrði okkur innan handar með allar breytingar varðandi
svæðið á Hamranesiog að Þytur yrði settur í forgang með nýtt svæði á undan nýjum
aðilum sem ekki hafa verið með aðstöðu í hrauninu. Þessu máli verður fylgt eftir
á næstu dögum og nýjar upplýsingar settar inn á netið.
Fyrsti félagsfundur vetrarins verður í
Garðaskóla fimmtud. 3. október kl. 20:00
Á dagskrá er að fara yfir sumarstarfið, ræða hugmyndir um efni næstu
félagsfunda og vetrarstarfins og undirbúningur undir aðalfund félagsins sem
verður haldinn í nóvember. Þá láta þrír stjórnarmenn af störfum og því þarf að
finna áhugasama aðila til starfa í stjórn á næsta starfstímabili. Þeir sem hafa
áhuga geta skráð sig á fundinum.
Gullfalleg Ultimate fór í loftið með glæsibrag
Sunnudaginn 18. ágúst mætti Friðrik Ottesen með gullfallegan Ultimate
sem hann keypti af Skyldi Sigurðssyni módelsmiði. Þetta er glæsileg vél, stór og
falleg og búin tveggja strokka 3W 70 mótor sem skilar um 7 hestöflum. Flugtakið
var gert í nokkuð miklum vindi, en það virtist ekki hafa nein áhrif á vélina.
Það var tignarlegt sjón að horfa á þessa stóru aflmiklu vél fara í loftið og
hreyfingarnar eins og um flugvél í fullri stærð væru um að ræða. Eftir nokkra
hringi í öruggum höndum (pinnum) Friðriks var vélinni lennt aðeins utan brautar
á túninu. Friðrik hló þá og sagðist hafa haldið að hún væri nær, en stærðin hafi
blekkt sig í lendingunni.
Skemmtilegt flugmót á Melgerðismelum 10.-11. ágúst
Flugmódelfélag Akureyrar stóð fyrir sínu árlega flugmóti á
Melgerðismelum helgina eftir Verslunaramannahelgi. Mikill fjöldi aðila mætti á
svæðið frá Akureyri, Selfossi og Reykjavík og veðrið slapp fyrir horn með
strekkings vindi. Mikið var flogið og langt fram á kvöld á laugardeginum þar til
hefðbundið grill norðanmanna hófst. Maturinn var frábær og stemmningin í
grillinu góð. Nokkrir flugmenn mættu líka á svæðið á stærri vélum og var því oft
mikið um að vera í loftinu. Byrjað var að fljúga á sunnudeginum þegar menn
vöknuðu og flogið fram á miðjan dag. Nokkrar vélar áttu harkalega snertingu við
jörðina og rætt var um að norðanmenn yrðu á næsta ári að lækka jörðina um einn
metra eða svo. Frábærlega var staðið að öllu hjá Akureyringum og margir gestir
sóttu svæðið heim á laugardeginum. Það bregst ekki að þessi helgi er og verður
alltaf toppurinn á sumrinu fyrir okkur flugmódelmenn. Hafið þakkir fyrir þessa
frábæri helgi, Akureyringar.
Margir góðir gestir á Piper Cup móti 7.
ágúst
Pétur Hjálmarsson stóð fyrir árlegu Piper Cup móti hjá félaginu og
þangað mættu margir góðir aðilar með sínar vélar. Mikið var flogið og guli
liturinn fyllti himinhvolfið. Ottó Tynes kom á "stóra" Cupinum sínum og tók
nokkrar lendingar og sýndi skemmtileg tilþrif. Mótið var áfallalaust að mestu,
en Pétur Hjálmars missti sinn Piper Cup undan vindi og laskaði lítillega. Allir
þátttakendur fengu merki mótsins sem Pétur Hjálmarsson afhennti. Við þökkum
Pétri fyrir þetta stórskemmtilega mót sem setur svip á starfsemi félagsins.
Stórflugmóti Einars Páls í Mosfellsbæ
frestað til 14. september
Stórskalamótinu hans Einars Páls er frestað til 14. september og gert
ráð fyrir að menn byrji að koma um kl. 11:00. Við hvetjum sem flesta með vélar
yfir 2 metra í vænghaf til að mæta.
Lisflugmóti miðvikudaginn 17. júlí frestað
um óákveðinn tíma
Samkvæmt mótaskrá er listflugmót á dagskrá 17. júli, en fresta verður
þessu móti um óákveðinn tíma af óviðráðanlegum orsökum. Þegar mótið verður
haldið mun verða sent út bréf til allra félagsmanna með nýjum lisflugskerfum.
Truflanir á Hamranesi herja á okkur
Tvær vélar fóru niður á sama staða og tíma eitt kvöldið. Náð var í
skannan og komu þar fram truflanir sem eru ekki eðlilegar. Á næstu dögum verður
haldið áfram að skanna og jafnvel óskað eftir að opinberir aðilar athugi hvað
þarna er á ferðinni.
Fyrsta listflugsmót sumarsins breyttist í flugkomu
Allt var tilbúið kl. 18:00 miðvikudaginn 12. júní, en því miður voru
fáir keppendur. Tveir flugu stærra prógrammið (Guðmundur formaður og Böðvar), en
dómarar gerðu athugasemdir við uppsetningu flugkerfa og fanns þau erfið að
skilja eins og þau eru á blöðunum. Þetta verður skoðað fyrir næstu keppni og
líklega verður stærra prógrammið fellt niður og í staðinn tekið upp kerfi sem
Birgir Sigurðsson setti upp á sínum tíma. Margir voru á staðnum að fljúga og
veðrið var ótrúlega gott. Grillað var eins og er alltaf á listflugmótum og
kostaði kr. 300 að borða pylsur og drekka gos. Böðvar kom með þríþekuna sína
eftir viðgerð í prufuflug og tóks flugið frábærlega. Hann er búinn að skipta um
lit á vélinni og má sjá myndir hér að neðan af þessari fallegu vél. Karl kom með
Diabolo og flaug henni tvö flug. Þessi vél hafði áður flogið, en þetta var
fyrsta flug eftir viðgerð. Vélin er stór og gífurlega falleg í loftinu, en
mótorinn var með gangtruflanir.
Listflugsmóti frestað til
miðvikudaginn 12. júní kl. 18:00 á Hamranesi
Menn hittast kl 18:00 og fara yfir
flugkerfin og kl. 19:00 hefst síðan keppnin.
Listflugsmót og grillveisla
miðvikudaginn 5. júní kl. 18:00 á Hamranesi
Menn hittast kl 18:00 og fara yfir
flugkerfin og boðið verður upp á eldgrillaðar pylsur og gos
fyrir kr. 300. Birgir Sigurðsson mun halda uppi röð og reglu
í keppninni með aðstoð Skjaldar, Guðmundar og fleiri
góðra aðila. Fyrst verður keppt í Byrjendaflokki og að
honum loknum í Keppnisflokki I fyrir reyndari flugmenn. Hver
þátttakandi flýgur þrjár umferðir og stigin reiknast eftir
tveimur bestu umferðunum. Hægt er að nálgast bæði flugkerfin á heimsíðu
Þyts undir fróðleikur (Rit um listflugkeppnir 2001) http://www.thytur.is , en athuga skal að leiðrétta þarf lið. nr. 10 í
byrjendaflokki sem á að vera 360° velta. Einnig þarf að
leiðrétta lið nr. 12 í Keppnisflokki I sem á að vera 45°
uppleggur, 2 af 4 punkta velta og hálf velta og til baka í
hvora átt.
Þytsmótið laugardaginn 1.
júní kl. 10:00
Listflugsmót 5. júní kl. 19:00 á Hamranesi
Næsti viðburður á mótaskrá er Þytsmótið
laugardaginn 1. júní á Hamranesi þar sem Pétur Hjálmarsson
ætlar að sjá um glaðan dag með okkar hjálp!!! Þar á eftir
verður listflugmót á Hamranesi sem verður miðvikudaginn 5.
júní kl. 19:00. Kl. 18:00 verður kynning á
listflugsprógrömmum sem á að keppa í, en þau eru tvö.
Dornier og Fokker á félagsfundi 9. maí
Fundarefni þessa fundar var að skoða eitt stórkostlegasta flugmódel
sem smíðað hefur verið á Íslandi. Jakop er í þetta sinn með eitt stærsta og
tæknilega stórkostlegasta módel sem sést hefur hér á landi. Þriggja metra langan
Dornier með tveimur mótorum (einn að framan og einn að aftan) og
skiptiskrúfubúnað á báðum. Mótorinn að framan er þar að auki með vendiskrúfu.
Allan þennann búnað hefur Jakop smíðað sjálfur sem og einnig lendingarbúnaðinn
sem er með vökvafjöðrun. Á fundinn kom einnig Richard með ótrúlega fallega
Fokker tvíþekju og voru vængirnir á henni handmálaðir í litlum tíglum sem tók
hundruði klukkutíma. Sérstaklega var gaman að sjá þessa tvo fulltrúa frá
sitthvorri heimstyrjöldinni og þann tæknilega mun sem var á milli þessa
tímabila. Látum myndirnar segja það sem vantar upp á.
Félagsfundi frestað
um eina viku
Fundarefnið 3 metra langur Dornier með tveimur mótorum
Vegna óviðráðanlegra orsaka verður að fresta
félagsfundi sem átti að vera fimmtudaginn 2. maí til
fimmtudagsins 9. maí. Þessi síðasti fundur á vetrinum ætti
samkvæmt venju að vera haldinn á Hamranesi, en vegna stærðar
og umfangs á fundarefni verður fundurinn haldinn í
Garðaskóla kl. 20:00. Við hvetjum alla áhugasama
flugmódelmenn til að koma á fundinn og skoða eitt
stórkostlegasta flugmódel sem smíðað hefur verið á
Íslandi. Jakop hefur smíðað margar skemmtilegar vélar, en í
þetta sinn er hann með eitt stærsta og tæknilega
stórkostlegasta módel sem sést hefur hér á landi. Þriggja
metra langan Dornier með tveimur mótorum (einn að framan og
einn að aftan) og skiptiskrúfubúnað á báðum. Mótorinn að
framan er þar að auki með vendiskrúfu. Allan þennann búnað
hefur Jakop smíðað sjálfur.
Svifflugur og fallegur Sukoi
hjá Rafni
Fimmtudaginn 4. apríl var haldinn félagsfundur og
þar var kynnt samstarfsverkefni nokkurrra svifflugmanna í
þróun nýrrar svifflugu. Þessir aðilar eru Frímann, Hannes
og Guðjón og hafa þeir sett saman mót til að steypa skrokk,
og skurðarplötur til að skera út "foam" væng á
eigin hönnun að svifflugu með 60" vænghafi. Áður hefur
verið smíðuð sviffluga með 120" vænghafi og báðar
eru afskaplega skemmtilegar að fljúga. Þessar svifflugur eru
í sama flokki og hin heimsfræga Tragi sviffluga sem mikið
hefur verið notuð í listflugskeppnum um allan heim. Þessi
íslenska sviffluga er því hraðskreið og mjög góð fyrir
reynda flugmenn til að fljúga listflug. Þetta framtak þessara
mætu manna er dæmi um þá stöðu sem íslenskt módelumhverfi
hefur, sem gefur oft ekkert eftir því besta sem gerist á
heimsvísu.
Rafn Thorarensen mætti á staðinn með gullfallegan Sukoi með
vænghaf upp á 215 cm sem hann hefur verið að smíða
undanfarin ár. Vélin er búinn 3W 60 cc mótor sem gefur um 6
hestöfl og 22-10 skrúfu og verður búin reykkerfi. Í vélinni
er síriti sem skráir hámarkshraða og hægt að lesa þær
upplýsingar eftir að vélinni hefur verið lennt. Vélin er
öll uppbygð úr balsa og krossvið og klædd með filmu nema
vélarhlífin sem er sprautuð. Við óskum Rafni til hamingju
með vélina og hlökkum til að sjá hana fljúga.
Vínarbrauðsmótið verður
daginn fyrir Páskadag (31. mars)
Laugardaginn 31. mars (daginn fyrir páskadag) verður
Vínarbrauðsmótið haldið, en þá verður um ár liðið
síðan það fór síðast fram. Að venju verður það haldið
í flugstöðinni á Hamranesflugvelli. Mótið hefst kl. 12:00, en þá mun
Pétur Hjálmarsson setja það formlega. Að sjálfsögðu
verður mótið haldið hvernig sem veðrið verður. Mótinu
verður því ekki frestað. Þetta eru sömu reglur og gilda um
vöfflumótið. Áríðandi er að menn mæti með vínarbrauð
og kaffi á brúsa, og svo auðvitð módel ef veður leyfir.
Félagsmaður, sem hefur óskað nafnleyndar, vill sérstaklega
koma því á framfæri, að vínarbrauðin séu með miklum
glassúr ;-)
Fróðlegur félagsfundur 14.
mars
Haldinn var félagsfundur 14. mars og var vel mætt á
fundinn. Sýnd var mynd frá módelklúbbi í Danmörku sem
Haraldur Sæmundsson tók, en hann var búsettur þar um tíma.
Farið var yfir fyrstu tillögu að mótaskrá sumarsins, sýndar
myndir frá 3W listflugmóti í Þýskalandi og Pétur
Hjálmarsson var síðan með fróðlegan fyrirlestur um
"servó" og móttakara.
Félagsfundi fimmtudaginn 7.
mars er frestað til 14. mars
Af óviðráðanlegum ástæðum er félagsfundi sem
átti að vera 7. mars frestað til 14. mars. Fundurinn verður
í Garðaskóla kl. 20:00.
Catalinan hans Sturlu er
stórkostleg!!!!!!
Félagsfundurinn 14. febrúar 2002 var einn skemmtilegasti
fundurinn í langan tíma. Sturla Snorrason mætti með
Catalinuna sína og er þessi vél einstaklega falleg og
stórkostlega vel smíðuð. Sýndar voru vídeómyndir af fyrsta
fluginu og einnig eftir viðgerð á hjólastelli sem brotnaði
í fyrstu lendingunni. Vélin er smíðuð eftir teikningum sem
eru hannaðar og útfærðar af Sturlu og þessar teikningar
einstakar. Vélin hefur vakið mikla athygli erlendis og er
verið að skrifa og setja upp greinar um hana sem eiga að
birtast í erlendum módelblöðum. Catalinan er með tveimur
Quatra 35 mótorum og um fjórir metrar í vænghaf. Hún er með
uppdraganlegum hjólabúnaði sem Sturla smíðaði sjálfur og
einnig er hægt að lyfta flotunum sem eru í efri stöðu
vængendar. Sturla segir að Catalinan sé mjög stöðug á
flugi og þægilegt að fljúga henni. Við óskum Sturlu til
hamingju með þennan gullmola sem er einstakur á
heimsmælikvarða. Við hér á Íslandi stöndum greinilega
stóru körlunum út í heimi vel á sporði.
Félagsfundur verður
fimmtudaginn 14. febrúar kl. 20:00 í Garðaskóla - Sturla
mætir með Catalinu
Annar félagsfundur Flugmódelfélagins Þyts verður
í Garðaskóla Garðabæ fimmtudaginn 14. febrúar kl. 20:00. Á
dagskrá er heimsókn Sturlu með sína stóru og gullfallegu
Catalinu og mun hann kynna sögu vélarinnar, smíðina og
hvernig er að fljúga henni. Einnig eru önnur mál á dagskrá
að þessu lokunu. STJÓRNIN
Félagsfundi fimmtudaginn 7.
febrúar er frestað til 14. febrúar
Af óviðráðanlegum ástæðum er félagsfundi sem
átti að vera 7. febrúar frestað til 14. febrúar. Fundurinn
verður í Garðaskóla kl. 20:00.
Gamlar myndir - DC3 og synir Gunnars
Það er alltaf gaman að skoða gamlar myndir og hér
má sjá DC3 vélina hans Sturlu og syni Gunnars Jónssonar að
starta Saturn módeli. Ekki er vitað hvenær þessar myndir
voru teknar, en báðar eru líklega teknar á Hamranesi. Gaman
er að geta þess að sonur Gunnars Jónsonar var formaður Þyts
um tíma.
Fyrsti félagsfundur Þyts á árinu 2002 tókst vel
Fyrsti félagsfundur ársins var haldinn í
Garðaskóla 10. janúar 2002. Um 30 manns mættu á fundinn og
margir höfðu tekið með sér módel. Þau módel sem komið
var með voru af fjölbreyttum toga sem gerði þessa kynningu
enn skemmtilegri. Menn kynntu hver sitt módel og svöruðu
síðan spurningum. Myndir eru hér að ofan af öllum módelunum
sem kynnt voru nema af Chipmunk (180 cm vænghaf með 120 mótor)
sem Sigurgeir Ingimundarson var með og Diabolo (230 cm vænghaf
og 60 cc 3W bensínmótor) sem Guðmundur G. Kristinsson
kynnti.
Fyrsti félagsfundurinn 2002
verður í Garðaskóla fimmtudaginn 10. janúar kl. 20:00 - Allir eiga að koma með eitt
flugmódel
Fyrsti félagsfundur ársins verður í Garðaskóla
10. janúar kl. 20:00. Á dagskrá eru tvö málefni: (1)
Félagsmenn kynna hver eitt flugmódel sem getur verið í kassa,
í smíðum eða tilbúið. Hver eigandi segir nokkur orð um
sitt flugmódel og svarar spurningum fundarmanna. (2) Önnur
mál. Við hvetjum félagsmenn til að mæta og taka þátt í
skemmtilegum fundi.
Midwest Extra 300 XS til
sölu - Verð kr.
50.000 með mótor.
Sigurgeir er með til sölu Midwest Extru sem er
tilbúin í loftið (bara að setja í servo og móttakara).
Friðrik smíðaði þessa vél sem er um tveir metrar í
vænghaf og það er búið að fljúga henni nokkur flug. Extran
er útbúin með Zenoa 38 sem fylgir með vélinni. Hægt er að
hafa samband við Sigurgeir í síma 895 3083 til að fá nánari
upplýsingar.